May 2nd Dunidda \ U.S. Politics Madaxweynaha Mareykanka Barack Obama ayaa sheegay inay dileen Hogaamiyihii iyo aas aasihii Urur weynaha Al-Qaacida, kadib khudbad si toos ah xalay habeen barkii uu u jeediyay shacabka Mareykanka, kaasoo ka baxeysay Warbaahinta.
Madaxweyne Obama ayaa xaqiijiyay in weerar ay fuliyeen Koox yar oo Mareykan ah ay ku dileen guri ku yaal Pakistan Hogaamiyihii Al-Qaacida Usama Bin Laden, Meydkiisana ay qaateen sida uu yiri.
Saraakiil ka tirsan Mareykanka ayaa xaqiijiyay in Meydka Usama Bin Laden ay arkeen, iyadoo howl galkaas uu qeyb ka ahaa Nin Mareykanka u shaqeynayay oo ka qeyb qaatay xogta ku aadaneyn halka Usama Bin Laden uu ku sugnaa.
Guri weyn oo qasri ah oo ku yaal meel ku dhow Magaalada Islamabad ee dalka Pakistan ayaa la sheegay inuu ku sugnaa, iyadoo sanado badan la qiyaasaday inuu ku dhuumaaleysanayay buuraleyda u dhaxeysa Afganistan iyo Pakistan.
Usama Bin Laden ayaa madaxiisa waxaa la saaray lacag dhan 27-milyan oo doolarka Mareykanka, waxaana uu ahaa ninka loogu raadiska badnaa ee Caalamka, markii weeraradii 11-kii September ee Magaalooyinka Washington iyo New York lagu qaaday.
Dadweyne fara badan ayaa isugu soo baxay Magaalada Washington, kadib hadalkii Madaxweynaha Mareykanka uu ugu cadeeyay shacabkiisa in la dilay Usama Bin Laden.
Ali Musa
Axadle International Monitoring
