February 22nd Dunidda \ Somalia Dhaq dhaqaaq ciidan iyo diyaar garow dagaal ayaa ka jira Magaalada Baydhabo, iyadoo dadka deegaanka uu la soo dersay cabsi iyo walaac ay ka qabaan xiisadaha dagaal ee ka taagan deegaano ka tirsan Gobolka Bay oo Ciidamo Itoobiyaan gudaha u soo galeen.
Sida ay sheegayaan wararka dadka ku nool magaalada Baydhabo ee Xarunta Gobolka Bay ayaa noqday dareen ku joog ah, iyagoo ka cabsi qaba in dagaalka ku soo fido.
Wararka qaar ayaa sheegaya in Saraakiil ka tirsan Shabaab ay ka baxeen magaalada, inkastoo gurmad xalay gaaray magaalada iyo kuwii ka soo baxay Bardaale ay difaac xoogan ka xirteed galbeedka Magaalada.
Sidoo kale Idaacadii Al-Andulus ee afka Shabaab ku hadleysay ayaa hawada laga saaray, iyadoo Idaacada aanay saaka hawada ku jirin sida dadka deegaanka soo wariyeen.
Wararka ayaa intaa ku daraya in qalabkii Idaacada la fur furay, sababo ku aadan dhaq dhaqaaqyada Ciidan ee ku soo wajahan iyo Ciidamada Itoobiya oo qiyaastii 60-KM u jira.
Dagaalyahano ka tirsan Shabaab ayaa xalay faarujiyay Bardaale, kadib markii Ciidamo badan Itoobiyaan ku soo dhowaadeen, waxaana Bardaale ay u jirtaa Baydhabo ilaa 50-KM.
Si kastaba ha ahaatee Dowladda KMG ayaa sheegtay in maalinimada jimcaha ay qabsan doonto Magaalada Baydhabo oo ah magaalo Istiraatiiji ah.
