January 22nd Dunidda \ Somalia Xukuumada Washington ayaa qiratay inay xubin sare oo ka tirsan Hogaamiyeyaasha sare ee Al-Qaacida shalay ku dishay diyaaradaha kuwa aan cidina wadin ee Drone, markii ay ku weerartay Kolonyo uu la socday Bilaal Al-Barjaawi oo u dhashay dalka Lubnaan.
Sarkaal ka tirsan Dowladda Mareykanka oo qariyay magiciisa in saxaafada laga shaaciyo ayaa sheegay in Mareykanka uu ka dambeeyay weerarka lagu qaarijiyay Bilaal.
Jariirada Washington Post ayaa soo xigatay Sarkaalkan oo diiday inuusan fasax u heysan in saxaafada inuu ka hadlo ayaa sheegay in Bilaal Al-Barjaawi uu xiriir soke la lahaa Hogaamiyihii Al-Qaacida ee Geeska Afrika Fazul Cabdalla Mohamed oo bishii June sanadkii hore ku dileen Ciidamada Dowladda Check-point ku yaala duleedka Muqdisho, markii uu ku soo qaldamay.
Afhayeenka Al-Shabaab Cali Dheere ayaa saxaafada u xaqiijiyay in Bilaal Al-Barjaawi oo heystay dhalashada Ingiriiska, balse asal haan ka soo jeeday dalka Lubnan uu ku dhintay weerar ay fuliyeen diyaaradaha Drone, kadib markii saddex gantaal ku rideen gaari uu la socday oo marayay nawaaxiga Isbitaal Carafaat.
Mareykanka wali tafaasiil dheeraad ah kama bixin weerarka lagu dilay Bilaal Al-Barjaawi, waxaana Hogaamiyahan uu horay uga bad baaday weerar diyaaradaha Drone bishii June ka fuliyeen duleedka Magaalada Kismaayo.
Bilaal oo loo yaqaanay Abuu Xafsa ayaa in muddo ah ay baadigoobayeen Mareykanka tan iyo wixii ka dambeeyay markii la ogaaday in xiriir dhow la lahaa Al-Qaacidada dalka Yemen.
