February 21st Dunidda \ Somalia Ciidamo ka tirsan kuwa gaarka ah ee dowlada Maraykanka ayaa ku dhintey kadib markii dayuurad nooceedu yahay kuwa wax basaasa ay ku burburtay meel u dhow saldhig milatari ee ay ciidamada Maraykanku ku leeyihiin dalka Jabuuti. Dayuuradan oo soo dhacday sabtidii ayaa ka soo laabatay dalka Afganistan waxaana u kala cararay burburka dayuuradan ciidamada Maraykanka ee kusugan saldhigga Camp Lemonnier ee dalka Jabuuti.
Burburka dayuuradan ayaan la ogeyn sababta keentay iyadoo la sheegay in la baarayo sababta ay burburtay dayuuradan.
War ka soo baxay ciidamada Maraykankana waxa ay sheegeen in dayuuradan ay ku gudajirtey markii ay soo dhaceysey howlaheedii caadiga ahaa ee sahanka iyo sirdoonka.
Dayuuradan ayaa ku burburtay meel u jirta lix meyl oo qura saldhiga ciidamada Maraykanka ay ku leeyihiin dalka Jabuuti.
Dowlada Maraykanka ayaa ka samaysatay saldhig milatari dalka Jabuuti iyadoo saldhigaasina uu yahay mid ay kusugan yihiin ciidamada sirdoonka iyo sahanka u qaabilsan Maraykanka iyo sidoo kale dayuuradaha Drones la yiraahdo oo aanay cidna wadin weeraradana geysan kara.
