December 16th Horyaalada Kooxda Chelsea oo heysata horyaalka yurub ayaa galabta ku guul-darreysatay in ay noqoto horyaalka adduunka, markii kulankii kama-dambeysta ee koobka kooxaha adduunka 1-0 ay kaga adkaatay kooxda Corinthians oo ka dhisan dalka Brazil.
Weeraryahanka Poulo Guerrero ayaa goolka guusha siiyay kooxda Corinthians qeybta labaad ee ciyaarta, taas oo ka dhigtay in markii labaad ay noqoto Corinthians horyaalka kooxaha adduunka.
Cahill oo daafaca uga ciyaara kooxda Blues ayaa dhammaadka cayaarta garoonka ka baxay markii loo taagay kaarka cas.
Macallinka kumeel-gaarka ah ee Chelsea Rafa Benitez ayaa koobkan kula guuleystay kooxda Inter Milan 2010-kii, hase yeeshee waxa uu ku guul-darreystay sanadkii 2005-ta, xilligaas oo uu leylinayay kooxda Liverpool.
Cassio oo Corinthians u ciyaara ayaa loo magacaabay xiddiggii tartanka ugu fiicnaa, iyadoo David Luiz (Chelsea) iyo Guerrero (Corinthians) ay labaad iyo seddexaad kala galeen sida ay u kala horreeyaan.
Kooxda Monterrey oo Mexico ka dhisan ayaa galabta kaalinta seddeexad ee koobkan gashay markii ay 2-0 kaga adkaatay kooxda Al Ahly ee reer Masar. Kooxda Monterrey waxaa loo magaaabay kooxdii ugu akhlaaqda fiicneed tartanka.
Cesar Delgado oo Argentina u dhashay una cayaara kooxda Monterrey iyo Hisato Sato uu u dhashay Japan kana tirsan kooxda Sanfrecce Hiroshima ayaa min 3 gool ku qaaday gool-dhalinta tartanka ee sanadkaan.
Corinthians Celebration FIFA Club World Cup Final
Axadle International Monitoring-Ciyaaraha
Somalia 
